Ağ məscid (Quba)

Ağ məscid və ya Quba Ağ məscid — Quba şəhəri Cəfər Cabbarlı küçəsində yerləşən məscid.

İnşası

İlk dəfə 1996-cı ildə məscidin ərazisində Hacı Elnur Əfəndiyev tərəfindən bir otaq tikilmiş, sonralar bu kiçik otaq məscidə çevrilmişdir. İbadətgah Elnur Əfəndiyevin təşəbbüsü, yerli sakinlərin yardımı ilə dağıstanlı ustalara inşa etdirilib. Məscidin kürsüsü və minbəri Türkiyədən gətirilmişdir. Məscidin inşa edilməsinin məqsədi "Aeroport" adlanan ərazidə yaşayan əhalinin məscidə olan ehtiyacını qarşılamaq üçün olub.

Memarlığı

İbadətgah düzbucaqlı formadadır. İbadət evinin fasadı ağ rəngdədir. Məscid üç mərtəbədən ibarətdir. İbadətgahın birinci mərtəbəsi toplantıların, konfransların keçirilməsi üçün istifadə olunur. İkinci mərtəbə kişilər, üçüncü mərtəbə isə qadınlar üçün nəzərdə tutulub. İbadət evinin adı isə ona fasadına görə verimişdir.

Cümhuriyyət muzeyi

Ağ məsciddə Cümhuriyyət muzeyi fəaliyyət göstərir. Muzey Hacı Elnur Əfəndiyevin şəxsi təşəbbüsü ilə Azərbaycanının azadlığı uğrunda mübarizə aparmış şəxslərin şərəfinə yaradılmışdır. Bu xatirə guşəsinin məqsədi qubalı cümhuriyyətçilərin həyat mübarizəsini insanlara çatdırmaqdır.

Hacı Elnur Əfəndiyev Qubanın kəndlərindən həmin şəxslərə məxsus əşyaları toplayaraq bu muzeyi yaratmışdır. Muzeydə cümhuriyyətçilərin əşyalarından başqa seyidlərdən, övliyalardan qalan maraqlı təsbehlər, əl işləri də nümayiş olunur.

Cümhuriyyət muzeyində Müsavat hökumətinin qurucularından olan İttihad Partiyasının nümayəndəsi Həmdulla əfəndi və onun silahdaşlarının portretləri, əşyaları toplanıb. Onların Qubada başladıqları xalq hərəkatı dövründən qalan silahları və əlyazmaları qorunub saxlanılır.