Haydar Mescidi (Mingeçevir)

Mingəçevir şəhər Heydər məscidi — Azərbaycanın Mingəçevir şəhərinin Aydın Məmmədov küçəsində yerləşən tarixi məsciddir.

Tarixi

Məscid 1998-ci ildə inşa edilmişdir. Burada fəaliyyət göstərən Mingəçevir şəhəri "Heydər" məscidi dini icması 15 iyul 2010-cu ildə dövlət qeydiyyatına alınmış dini icmalardan biridir. Yarandığı dövrdən etibarən Mingəçevir şəhərinin əsas ibadət məkanlarından biri kimi fəaliyyət göstərir. Burada gündəlik və cümə namazları, həmçinin dini mərasimlər keçirilir.

Memarlıq üslubu

Məscidin həyətyanı sahəsi 4000 m²-dir və daş hasarla əhatə olunmuşdur. Həyətdə həmçinin hovuz da yerləşir. Məscidin ibadət zalında eyni vaxtda 1500 nəfərin namaz qılması mümkündür. Məscid böyük günbəzə və qoşa minarəyə malikdir. İbadət zalı iç və fasad tərəfdən ağ mərmərlə üzlənib. Minarələr dəmir borudan olub, dəyirmi formadadır. Məscidin giriş qapısının ön tərəfində yerləşmiş eyvan 3 tağdan ibarətdir. Günbəz ağ dəmir təbəqə ilə işlənib. Nəhəng günbəz ibadət zalında dörd sütun üzərində dayanır. Günbəzin üstündə dəmirdən ərəb əlifbası ilə "Allah" kəlməsi yazılıb. Çöl tərəfdən isə məscid binası mərmərlə üzlənmişdir.