Kasımiye Medrese

Kasımiyə Mədrəsəsi (türkcə: Kasımiye Medresesi), digər adı ilə Kasım Paşa Mədrəsəsi, Türkiyənin Mardin şəhərində yerləşən keçmiş bir mədrəsədir (türkcə: medrese).

Coğrafiya

Mədrəsə, köhnə Mardin şəhər mərkəzinin cənub-qərbində yerləşir. Kasımiyənin hündürlüyü təxminən 975 metrdir (3,199 fut).

Tarix

Mədrəsənin tikintisinə, Anadolu bəyliklərindən olan Artuqlular sülaləsinin hökmdarı Sultan əl-Zahir Macd əl-Din İsa ibn Davud (və ya İsa Bəy) tərəfindən başlanmışdır. Lakin o, bina tam tikilmədən əvvəl, 1407-ci ildə Qaraqoyunlulara qarşı döyüşdə öldürülmüşdür. Şəhər Ağqoyunlu türkmənlərinin əlinə keçdikdən sonra tikinti davam etdirilmişdir. Ağqoyunlu sultanı Müizzəddinin oğlu Kasımın 1445-ci ildə mədrəsəni tamamladığı qeyd olunur.

1924-cü ildə, dini həyata qarşı ümumi hücum və cəmiyyəti yuxarıdan aşağı sekulyarlaşdırma cəhdi çərçivəsində, Türkiyədəki bütün mədrəsələr bağlanmışdır.

Bina

Əsas bina düzbucaqlı formadadır. Bəzəkli bir portal vasitəsilə giriş cənubdan həyata keçirilir. Həyətdə bir hovuz var. Su mənbəyi, doğuşu təmsil edən divardakı bir qıfdır. Hovuzun suyu, ölümü və sıratı (İslam inancına görə cənnətə aparan cəhənnəm üzərindəki dar bir körpü) təmsil edən dar bir yarıqdan axıb gedir. Dərs otaqları hovuzu əhatə edir. Dərs otaqlarının qapıları, tələbələrin içəri girərkən müəllimlərinin qarşısında ehtiramla əyilmələrini təmin etmək üçün qəsdən aşağı saxlanılmışdır.

Fil saatı

Eyvanın şimalında, 12-ci əsr müsəlman mühəndisi əl-Cəzəri tərəfindən dizayn edilmiş fil saatının bir reproduksiyası yer alır.