Maqsud İbrahimbəyov yaradıcılıq mərkəzi

Maqsud İbrahimbəyov yaradıcılıq mərkəzi — Azərbaycan yazıçısı, dramaturqu, ssenaristi və deputatı olmuş Maqsud İbrahimbəyovun yaradıcılığına həsr olunmuş muzey. Mərkəzə Anna İbrahimbəyova rəhbərlik edir.

Bina

Bina 1914-cü ildə yazıçının ana tərəfdən babası, neft sənayeçisi Ələkbər Məşədibəyov üçün inşa edilmişdir. O, inqilabdan sonra, 1924-cü ildə güllələnmişdir. Binanın memarı Zivər bəy Əhmədbəyov olmuşdur. Yazıçının anası Fatma xanım Məşədibəyova-İbrahimbəyova bu evdə anadan olmuşdur. İnqilabdan sonra bina yenidən qurularaq kommunal mənzillərdən ibarət yaşayış evinə çevrilmiş və 1970-ci illərə qədər bu məqsədlə istifadə edilmişdir. İkinci Dünya müharibəsi illərində binanın zirzəmisi sığınacaq kimi istifadə olunmuşdur.

Bina iki mərtəbəlidir, terrası və zirzəmisi var. 1978-ci ildən bu binada Sovet Sülh Komitəsinin Azərbaycan şöbəsi fəaliyyət göstərmişdir.

Mühüm mədəni irs obyekti kimi bina 2001-ci ildə "İçərişəhər" Dövlət Tarix-Memarlıq Qoruğunun tarixi abidələri siyahısına daxil edilmişdir.

Açılışı

2016–2017-ci illərdə Heydər Əliyev Fondunun dəstəyi ilə binada bərpa işləri aparılmışdır. Azərbaycan Prezidenti İlham Əliyevin 1 fevral 2018-ci il tarixli Sərəncamına əsasən bu binada Maqsud İbrahimbəyov Yaradıcılıq Mərkəzi yaradılmışdır. Mərkəzin yaradılması təşəbbüsü yazıçının həyat yoldaşı Anna İbrahimbəyovaya məxsus idi. Açılış mərasimi 2018-ci ilin mart ayında keçirilmişdir.

Birinci mərtəbədə kitabxana və konfrans zalı, ikinci mərtəbədə isə muzey yerləşir. Muzeydə yazıçının iş otağı, müxtəlif dillərdə nəşr olunmuş kitablarının nümayiş etdirildiyi ədəbi otaq var. Muzey otaqlarından birində Anna İbrahimbəyovanın mərkəzə hədiyyə etdiyi yazıçıya məxsus silah kolleksiyası sərgilənir. Eksponatlar arasında həmçinin ordenlər, medallar, deputat vəsiqələri, fəxri fərmanlar, yazıçının əsərləri əsasında səhnələşdirilmiş tamaşaların afişaları, onun ssenarisi əsasında çəkilmiş filmlərə aid materiallar, eləcə də yazıçının 2012-ci ildə Nobel mükafatına namizədliyinin irəli sürülməsi haqqında sənəd yer alır. Ailə otağında isə Məşədibəyovlar və İbrahimbəyovlar ailələrinə aid fotoşəkillər nümayiş etdirilir.