Salam Mosque

Salam məscidi və ya Poladlı məscidi — XVIII əsrdə tikilmiş tarix-memarlıq abidəsi, məscid. Azərbaycanın Fatmayı kəndində yerləşir.

Məscid, Azərbaycan Respublikası Nazirlər Kabinetinin 2 avqust 2001-ci ildə verdiyi 132 nömrəli qərar ilə yerli əhəmiyyətli daşınmaz tarix və mədəniyyət abidələrinin siyahısına salınıb.

Haqqında

Salam məscidi Fatmayı kəndinin mərkəzində tikilib. Məscid həm də Poladlı məscidi kimi tanınır. Onun neçənci əsrdə tikilməsi ilə bağlı fikirlər müxtəlifdir. Bəzi müəlliflər məscidin XVIII əsrdə bəziləri isə XIX əsrdə inşa olunduğunu qeyd ediblər. Məscidin döşəməsi daş plitələrlə işlənib. Günbəzinin diametri 5 metrdir.

Sovet işğalından sonra Azərbaycanda 1928-ci ildə rəsmi olaraq dinlə mübarizəyə başladılar. Bir çox məscid, kilsə və sinaqoqlar maarifləndirici istiqamətlərdə istifadə üçün klubların balansına verildi. Əgər 1917-ci ildə Azərbaycanda 3.000 məscid var idisə 1927-ci ildə bu rəqəm 1.700, 1928-ci ildə 1369, 1933-cü ildə isə 17 idi. Salam məscidi də bu dövrdə fəaliyyətini dayandırıb.

Azərbaycan müstəqilliyini yenidən bərpa etdikdən sonra 2 avqust 2001-ci ildə Azərbaycan Respublikası Nazirlər Kabinetinin verdiyi 132 nömrəli qərar ilə məscid, yerli əhəmiyyətli daşınmaz tarix və mədəniyyət abidələrinin siyahısına salınıb.