Timurtaş Paşa Mosque

Тимурташпаша мешіті (Таккеджилер немесе Такваджылар мешіті деп те аталады) — Кютахьядағы мешіт. Ол Кіші Бедестен маңында орналасқан.

Оны Сары Тимурташ Паша Кютахьяны басқарып тұрған кезінде, 1389 жылы салдырған. 1672 жылы Кютахьяға сапар шеккен Эвлия Челеби мешіттің жамағаты көп болғанын және азаншы тұратын жердің астындағы әшекейленген екі ағаш бағананың сөзбен айтып жеткізуге болмайтындай әдемі екенін жазады.

1761 жылы Анадолы уәлаятының уәлиі Силахдар Мехмед Паша мешітті жөндетіп, оған мұнара мен дәрет алатын шүмектер салдырған және оның уақыф мүлкін көбейткен. Силахдар Мехмед Паша мешіттің уақыфнамасын 1764 жылғы желтоқсанда рәсімдеп, уақфына мүдерристерден, Кютахьядағы Мухи-заде әулетінің атасы Абдуррахман Мұхиддин Эфендиді қаймақам және назир етіп тағайындаған. Мешіт 1834 және 1836 жылдары Кютахья уәлиі Дилавер Паша тарапынан жөнделген. Бұл жұмыс соңғы жамағат орны деп аталатын дәлізден басталған. Бұл дәліздің үстін ағаш төбемен жапқан. Мешіт кейінірек, 1839 жылы Кютахья мюаджелят назиры Салих Эфендидің қолдауымен қайта салынғандай дәрежеде жөнделген. Орталық алаңша 9 метрлік барабанда төрт терезесі бар күмбезбен жабылған. Мешіттің қазіргі кіреберісі мен аула қақпасы алғашқы ғимараттан қалған, ал есік қанаттары 16 ғасырдан жеткен. Аула қақпасының айналасы қарапайым сталактитті және жапырақ тәрізді нақыштармен, доға тастары бедерлі оймалармен әрленген.