Mosques in Boradigah

Boradigah Cümə məscidi — 1853–1854-cü illərdə Masallı rayonunun Boradigah qəsəbəsində tikilmiş məscid. Azərbaycan Respublikası Nazirlər Kabinetinin 2 avqust 2001-ci ildə verdiyi 132 nömrəli qərar ilə məscid yerli əhəmiyyətli daşınmaz tarix və mədəniyyət abidələrinin siyahısına salınıb.

Tarixi

Boradigah Cümə məscidi 11853–1854-cü illərdə Masallı rayonunun Boradigah qəsəbəsində tikilib.

Sovet işğalından sonra 1928-ci ildə Azərbaycanda rəsmi olaraq dinlə mübarizəyə başladılar. Bir çox məscid, kilsə və sinaqoqlar maarifləndirici istiqamətlərdə istifadə üçün klubların balansına verildi. Əgər 1917-ci ildə Azərbaycanda 3.000 məscid var idisə 1927-ci ildə bu rəqəm 1.700, 1928-ci ildə 1369, 1933-cü ildə isə 17 idi. Boradigah Cümə məscidi də bu dövrdə fəaliyyətini dayandırıb və məscidin binasından taxıl anbarı kimi istifadə olunub. 1989-cu ildən etibarən məscid yenidən dindarların istifadəsinə verilib. 1997-ci ildə kənd sakinlərinin şəxsi vəsaiti hesabına məsciddə təmir işləri aparılıb.

Azərbaycan müstəqilliyini yenidən bərpa etdikdən sonra 2 avqust 2001-ci ildə Azərbaycan Respublikası Nazirlər Kabinetinin verdiyi 132 nömrəli qərar ilə məscid, yerli əhəmiyyətli daşınmaz tarix və mədəniyyət abidələrinin siyahısına salınıb. Məsciddə Boradigah məscidi dini icması fəaliyyət göstərir.

Memarlığı

Boradigah Cümə məscidi kərpicdən tikilib. Rəngli şüşələrdən ibarət iki tağvari pəncərəsi var. Məscidin taxtadan hazırlanmış düzbucaqlı tavanını beş sütun saxlayır. İbadət zalında dördpilləli minbər və 3,5 metr hündürlüyündə mehrab yerləşir. Qadın və kişi zalları bir-birindən taxta arakəsmə ilə ayrılıb. Qadınlar şöbəsinin giriş qapısı ayrıdır.