Museum of Outstanding Personalities

Şəxsiyyətlər Muzeyi – Azərbaycanın Xaçmaz şəhərində yerləşən açıq səma altında muzey.

Tarixi

Şəxsiyyətlər Muzeyi 2006-cı ildə yaradılmışdır. Muzey 2006-cı ildə Xaçmazda tikilmiş 5 yeni muzeydən biri olmuşdur. Layihəsini rayon icra hakimiyyətinin başçısı və ixtisasca memar olan Şəmsəddin Xanbabayev vermişdir. 2010-cu ildə muzey genişləndirilərək yenidən qurulmuşdur. Azərbaycan prezidenti İlham Əliyev 2006 və 2011-ci illərdə muzeyi ziyarət etmişdir.

Xüsusiyyətlər

Açıq səma altında yerləşən muzeydə Azərbaycanın tarixi şəxsiyyətlərinə aid heykəl və büstlər sərgilənir. Muzey yaradılarkən burada Nizami Gəncəvi heykəli ilə yanaşı, Azərbaycanın daha 14 tarixi şəxsiyyətinin büstü yerləşirdi. 2010-cu ildə aparılmış yenidənqurma işlərindən sonra muzeydə Azərbaycanın 39 şair və yazıçısının, mədəniyyət və incəsənət xadiminin büstü qoyulmuşdur. 11 mart 2019-cu ildə muzeydə Hacı Zeynalabdin Tağıyevin büstü qoyulmuş, beləcə, muzeydəki tarixi şəxsiyyətlərin büstlərinin sayı 60-a çatmışdır. Muzeydə Məhəmməd Füzuli, Molla Pənah Vaqif, Xurşidbanu Natəvan, Mirzə Ələkbər Sabir, Cəlil Məmmədquluzadə, Hüseyn Cavid, Cəfər Cabbarlı, Üzeyir Hacıbəyov, Müslüm Maqomayev, Qara Qarayev, Fikrət Əmirov, Niyazi, Rəşid Behbudov, Şövkət Ələkbərova, Nəsibə Zeynalova, Habil Əliyev, Molla Vəli Vidadi, Hacıbaba Bağırov, Əliağa Ağayev kimi şəxsiyyətlərin büstləri yerləşir.

Muzey Xaçmaz Tarix-Diyarşünaslıq Muzeyinin ön tərəfində yerləşir və ümumi sahəsi 2 hektardır. Burada beş fəvvarə və bulaq kompleksi yerləşir. Muzeyin hasarlarında tar, kamança, sazın şəkilləri həkk olunmuşdur.