Azerbaijan State Museum of Ashug Art

Әзербайжан Ашық Өнері Мұражайы — Әзербайжанның Товуз ауданында орналасқан және Әзербайжан ашық өнеріне арналған мұражай. Мұражай Ашық Хусейн Бозалганлының атын алып жүреді.

Тарихы

Мұражай 1984 жылы озан-ашық мұражайы ретінде құрылған. 1990 жылдың 22 наурызында Әзербайжан Республикасы Министрлер Кабинетінің 116 нөмірлі қаулысы негізінде мұражайға мемлекеттік мәртебе және Хусейн Бозалганлының есімі берілген.

2013 жылы Министрлер Кабинетінің 374 нөмірлі өкімімен мұражайдың жаңа ғимаратының құрылысы басталды. Жаңа мұражай ғимаратының құрылысы 2019 жылдың екінші жартысында аяқталды. Мұражайдың ашылуы 2020 жылдың 4 наурызында өтті. Ашылу салтанатына Әзербайжан президенті Ильхам Әлиев қатысты. 2021 жылы мұражайдың 1208 келушісі болды, мұражайға 52 экскурсия ұйымдастырылды.

Ерекшеліктері

Мұражай — әлемде ашық өнеріне арналған жалғыз мұражай. Мұражай ғимаратының жалпы ауданы 3100 м² құрайды және үш қабатты. Мұражайда 40 орындық конференц-зал, қор бөлмелері, сувенир бөлмесі және кітапхана орналасқан. Мұражайдың ауласында Фуад Мәммәдов жасаған «Өнер Ашықтары» композициясы орнатылған.

Мұражайдың көрме залы 2-ші және 3-ші қабаттарда орналасқан. Ашық өнерінің тарихы мұнда хронологиялық реттілік пен өңірлер бойынша берілген. Мұражайдың 1–6-шы залдары ашық өнерінің тарихына, ашық репертуарларына, Гейдар Әлиев Қорына, ашық өнерін сақтау үшін атқарылған жұмыстарға арналған. 7–10-шы залдар ашық ортасы туралы: 7-ші зал Гёйче, Қарабах және Нахчыван ашық ортасына, 8-ші зал Гянджәбасар ашық ортасына, 9-шы зал Борчалы және Оңтүстік Әзербайжан ашық ортасына, 10-шы зал Ширван ашық ортасына арналған. Мұражайда саз үйірмесі жұмыс істейді.

Мұражайдың бірінші қабатында мұражай туралы электронды мәліметтер, «Гейдар Әлиев және ашық өнері» бұрышы және мұражайға есімі берілген Хусейн Бозалганлының мүсіні орналасқан. Мұражай коллекциясына 2111 экспонат кіреді. Экспонаттардың бірі — «Үштік» ашық композициясы.