Dünya Müzeleri Müzesi

Әлем мұражайлары мұражайы (түрікше: Dünya Müzeleri Müzesi) — Түркияның Эскишехир қаласындағы, түпнұсқалары әлемнің бірнеше тарихи аймақтары мен мұражайларында орналасқан көшірмелерді көрсететін мұражай. Оны жергілікті мәдени ұйым Aktiffelsefe Yeni Yüksektepe Kültür Derneği құрған және 2013 жылғы 8 мамырда Ышыклар маһаллесі, Гюлтуғрул көшесі, 6-үйде ашты. Алғашқы жылында мұражайды 2000-нан астам адам аралады.

Әлем мұражайлары мұражайының коллекциясында түпнұсқалары 12 ежелгі өркениетке жататын және дүниежүзінің әр түкпіріндегі 28 мұражай мен 20 тарихи орында көрсетілген 300-ден астам көшірме бар. Коллекцияда Эскишехирден 15 туынды да бар. Мұражайдағы туындыларды Aktiffelsefe еріктілері жасайды, оларды сатып алуға да болады. Мұражайдың үш галереясының екеуі мұражайдың тұрақты коллекциясын көрсетуге пайдаланылады; үшінші галерея — MuseCafe қызмет көрсететін ғимарат бағы. Сондай-ақ ежелгі өркениеттер мен туындылар туралы ақпарат беретін презентациялар, ежелгі ойын алаңдары және ізгіліктер дөңгелегі сияқты интерактивті аймақтар бар.

Мұражай күн сайын сағат 10:00–21:00 аралығында ашық және кіру тегін. Келушілерге Aktiffelsefe еріктілері жол көрсетеді. Кейде Aktiffelsefe еріктілері ежелгі өркениеттер, мифология, тарих және т.б. туралы конференциялар, шеберханалар мен көрмелер сияқты бірнеше іс-шара ұйымдастырады.