Бассейн көлі

Бассейн көлі — Қарқаралы тауындағы көрікті шағын көл.

Географиялық орны

Қарағанды облысы Қарқаралы қаласының оңтүстік-батысында 6 км жерде, Шайтанкөлдің маңында, жартасты шың басында (1200 м абс.), қарағайлы орман арасындағы ұзынша шұңқырда орналасқан. Пішіні мен аумағы жүзу бассейніне ұқсас болғандықтан осылай аталған.

Гидрографикасы

Ұзындығы 60 м, ені 40 м, орташа тереңдігі 2 м. Граниттен тұратын оңтүстік жағасы – биік тік жартас, ол жазда көлге көлеңке түсіріп, суын буланудан сақтайды. Батыс, солтүстік жағалары аласа. Шығыс жағасы ашық, жайпақ, ол арқылы көлдің артық суы ағып кетіп отырады да су деңгейі бір қалыпта сақталады. Қар және жаңбыр суларымен толысады, суы мөлдір, тұщы. Көлге демалушылар мен туристер жиі келеді.