A. Kasteyev State Museum of Arts

А. Кастеев атындагы Мамлекеттик көркөм өнөр музейи — Казакстандагы эң чоң искусство музейи, Алматы шаарында жайгашкан.

Музей 1976-жылдын 16-сентябрында Т.Г. Шевченко атындагы Казак мамлекеттик көркөм галереясынын (1935-жылы негизделген) жана Республикалык декоративдик-колдонмо искусство музейинин (1970-жылы негизделген) жыйнактарынын негизинде ачылган. 1984-жылы музей казак сүрөтчүсү Абылхан Кастеевдин (1904–1973) урматына аталган.

Музейдин коллекциясында 23 000ден ашык чыгарма бар, алардын арасында Казакстандын тарыхый жана азыркы искусствосу, советтик мезгилдин (1920–1990-жылдар) чыгармалары, орус искусствосу (XVII – XX кылымдын башы), Батыш Европа искусствосу (XVI–XX кылымдар) жана Чыгыш Азия (Кытай, Индия, Япония жана Корея) искусствосу бар.

Кастеев музейи, айрыкча, көрүнүктүү скульптор Исаак Иткинддин акыркы чыгармаларынын жыйнагы жана, дүйнөдөгү эң чоңу болушу мүмкүн болгон, казак живописи менен скульптурасынын коллекциясы менен белгилүү, анын ичинде Н. Нурмухаммедовдун, М. Кимдин, К. Есеркеевдин, К. Муллашевдин, Т. Абуовдун жана Е. Толепбайдын чыгармалары бар.

Тарыхы

1935-жылы Казак мамлекеттик көркөм галереясы (1935-жылдан бери Т.Г. Шевченко атындагы) тарабынан «Казак ССРинин түзүлгөнүнө 15 жыл» деп аталган көргөзмө уюштурулган. Галерея казак, орус жана чет элдик сүрөтчүлөрдүн чыгармаларын чогултуу боюнча иштерди жүргүзгөн.

1970-жылы Казакстандын Элдик колдонмо искусство музейи уюштурулуп, ал казак элинин колдонмо искусствосу менен кол өнөрчүлүк буюмдарын чогултуп, сактап, изилдеп жана жайылтып турган.

1976-жылы Т.Г. Шевченко атындагы Казак мамлекеттик көркөм галереясынын жана Казакстандын Элдик колдонмо искусство музейинин жыйнактарынын негизинде Казак ССРинин Мамлекеттик көркөм өнөр музейи түзүлгөн. Ошол эле жылдан бери ал заманбап имаратта (архитектору Г. Новиков) жайгашкан.

1982-жылы музейдин имараты Казак ССРинин республикалык мааниге ээ тарыхый-маданий эстеликтеринин тизмесине киргизилип, мамлекеттик коргоого алынган.

1984-жылы музей казак сүрөтчүсү, казак улуттук живопись мектебинин негиздөөчүсү Абылхан Кастеевдин атына конулган.