Karakhan Mausoleum

Карахан кесенеси — Казакстанда 11-кылымдан бери сакталып калган, республикалык маанидеги тарых жана маданият эстеликтеринин мамлекеттик тизмесине кирген архитектура эстелиги.

Курулушу, сүрөттөлүшү

Кесене Карахан династиясынан чыккан атактуу хан Шах-Махмуд Бугра Караханды мүрзөсүнүн үстүнө орнотулган. Күмбөзү гана кыйрап түшкөн кесененин төрт дубалы жана сырдалган кыштар менен оюм-чиймеленген эки мунарасы 19-кылымдын 90-жылдарына чейин сакталган. 1905-жылы анын кыйраган бөлүгү толугу менен бузулуп алынып, анын ордуна 1906-жылы жаңы кесене курулган. Жаңы курулушту ошол кездеги Ташкенттин ишаны Саид Баханов каржылаган. Кийинчерээк курулган кесене алгачкысына окшош эмес. Анын фасады Айша Биби кесенесине окшош болсо да, кыштардын оюм-чийимдеринин тартылышы жагынан Бухаранын орто кылымдык Ысмайыл Сомони күмбөзүнө окшоштук байкалат. Карахан кесенеси төрт бурчтуу, кеңири ортоңку бөлмөдөн жана үч кичине бөлүктөн турат. Ортоңку бөлмөнүн шыбы боз үйгө окшоштурулуп жабылган. Арткы тарабында эки мунарасы бар. Кесенинин фасады түштүккө карайт, ал эми анын ичиндеги мүрзө түштүктөн түндүккө карай жайгашкан. Кире бериш эшиги арка түрүндөгү тешик менен кооздолгон. Дубалдарынын ички жагы кесенинин мурдагы өз кыштары менен каланган, ал эми сырткы жагын каттоо үчүн жаңы кыш колдонулган.