Sakkiz qirrali minora

Sakkiz qirrali minora 1880-yillarda qurilgan minora, Ozarbayjonning Shaki shahrida joylashgan tarixiy va meʼmoriy yodgorlik.

Sovet bosqinidan keyin masjid binosi buzib tashlangan, biroq minora oʻz holicha saqlanib qolgan.

2001-yil 2-avgustdagi Ozarbayjon Vazirlar Mahkamasining 132-sonli qaroriga koʻra, minora mahalliy ahamiyatga ega koʻchmas tarixiy va madaniy yodgorliklar roʻyxatiga kiritilgan.

Tarixi

Sakkiz qirrali minora Shaki shahri Yuqori Bash mahallasida Abdurahimbey Hagverdiyev koʻchasida joylashgan. Taxminlarga koʻra, ushbu minora shu hududda joylashgan Jome masjidiga tegishli boʻlgan. Minoradagi bitik uning 1880-yillarda qurilganini koʻrsatadi. Minoraga tutash toshqabrdagi yozuvda olim Mustafo afandi shu yerga dafn etilgani qayd etilgan. Minoraning oʻzi qizil gʻishtdan, buzib tashlangan masjid binosining poydevori esa daryo toshidan qurilgan.

Ozarbayjonda sovet bosqinidan soʻng, 1928-yilda rasmiy ravishda dinga qarshi harakat boshlandi. Oʻsha yil dekabr oyida Ozarbayjon Kommunistik partiyasi Markaziy Qoʻmitasi koʻplab masjidlar, cherkovlar va sinagogalarni maʼrifiy maqsadlarda foydalanish uchun klublar tasarrufiga oʻtkazdi. 1917-yilda Ozarbayjonda 3 000 ta masjid mavjud boʻlgan boʻlsa, bu raqam 1927-yilda 1 700 ta, 1928-yilda 1 369 ta, 1933-yilga kelib esa atigi 17 tani tashkil qilgan. Shu davrda hududdagi masjid vayron qilingan, biroq sakkiz qirrali minora masjid binosidan alohida qurilgani sababli saqlanib qolgan. Hozirda masjid binosining faqat poydevori saqlangan.

Ozarbayjon mustaqillikka erishganidan soʻng, 2001-yil 2-avgustdagi Ozarbayjon Vazirlar Mahkamasining 132-sonli qaroriga muvofiq, sakkiz qirrali minora mahalliy ahamiyatga ega koʻchmas tarixiy va madaniy yodgorliklar roʻyxatiga kiritilgan.