Pirsaat Baba Külliyesi

Pirsaat Baba ziyarətgah-məscid kompleksi — Azərbaycan Respublikasının Şamaxı şəhərinin girəcəyində yerləşən ziyarətgah-məscid kompleksi.

Təsviri

Pirsaat Baba ziyarətgah-məscid kompleksi Azərbaycan Respublikasının Şamaxı rayonununda, Şamaxı şəhərinin girəcəyində, Mərzəndiyə kəndinin ərazisində, Sabir qəsəbəsinin yaxınlığında, Bakı-Şamaxı-Yevlax avtomobil yolunun kənarında, Pirsaat çayının sahilində yerləşir.

Ziyarətgah əhalinin ən çox ziyarət etdiyi müqəddəs ocaqlardan biridir, gündəlik olaraq yüzlərlə zəvvarlar tərəfindən ziyarət olunur. Həmçinin, tarixi abidədir.

Kompleksdə məscid də var. Məsciddə ibadət zalı ilə yanaşı, mərasim zalları da mövcuddur.

Tarix

Pirsaat baba peyğəmbər nəslindən olan kəramətli övliya olmuşdur.

Ziyarətgah orta əsrlərə aiddir — təxminən IX-XV əsrlər arasına. 1918-ci illdə ziyarətgah Hacı Cəfərqulu adlı xeyirxah şəxs tərəfindən yenidən ucaldaraq türbə şəklinə salınmışdı.

Azərbaycan müstəqilliyini bərpa edəndən sonra, ziyarətgah 1993-cü ildə yenidən inşa edilmişdi. Digər məlumata görə, türbə 1989-90 illərdə Şeyx İbrahim Paşa tərəfindən yenidən bərpa olunmuş, 1996 ildə isə dam örtüyü qoyulmuşdur.

2019-cu ildə Şamaxıda baş verən zəlzələ zamanı ziyarətgahın divarlarında çatlar əmələ gəlmiş, bununla ziyarətgaha zərər dəymişdi.

Heydər Əliyev Fondunun prezidenti və Azərbaycan Respublikasının birinci xanımı Mehriban Əliyevanın təşəbbüsü ilə 2020-ci ildə orada bərpa-yenidənqurma işlərinə və yeni məscid binasının inşasına başlanıldı. Həmin ilin may ayının 25-ndə Azərbaycan Respublikasının Prezidenti İlham Əliyev və birinci xanım Mehriban Əliyeva oraya səfər etmiş, ziyarətgahının yenidən qurulması çərçivəsində görülən işlərlə tanış olmuş, Pirsaat Babanın məzarını ziyarət etmişdilər.

1 noyabr 2021-ci il tarixində Azərbaycan Respublikasının Prezidenti İlham Əliyevin və birinci xanım Mehriban Əliyevanın iştirakı ilə Pirsaat Baba ziyarətgah-məscid kompleksinin bərpa və yenidənqurma işlərindən sonra açılışı oldu.