Taxtakörpü SA

Тахтакөпрі су қоймасы — Самур-Апшерон суару жүйесіне жататын су қоймасы. Самур-Апшерон суару жүйесін қайта құру жобасы аясында Әзербайжан Республикасының Шабран ауданы аумағында салынған.

Тарихы

Құрылысы 2007 жылы басталған. «Мелиорация және Су Шаруашылығы» АҚ тапсырыс берушісі болған осы жобаны «Азеркөпрі» — қазіргі Еуропа-Азия Құрылыс Корпорациясы «Еврaскон» Ашық Акционерлік Қоғамы деп аталатын экономикалық құрылым басқарған консорциум жүзеге асырды. Тахтакөпрі су қоймасына су берудің басталуына орай ресми рәсім 2013 жылдың 19 шілдесінде өтті. Самурчайдан алынған су өз ағысымен Вельвелечай-Тахтакөпрі каналы арқылы Тахтакөпрі су қоймасына жеткізіледі.

Ашылу салтанаты

Ашылу салтанаты 2013 жылдың 28 қыркүйегінде өтті. Ашылу салтанатына Әзербайжан Республикасының Президенті Ильхам Әлиев және оның жұбайы Мехрибан Әлиева қатысты.

Техникалық көрсеткіштері

Тахтакөпрі су қоймасының ауданы 8,71 шаршы километр. Бұл құрылғының жалпы су сыйымдылығы 270 миллион текше метр. Көлдің пайдалы су көлемі 238,4 миллион текше метр. Саз өзекті топырақ бөгет болып табылатын бұл гидротехникалық құрылғының түбіндегі ені 754, биіктігі 142,5 метр. Тахтакөпрі су қоймасы — Әзербайжанның ең биік топырақ бөгетті су қоймасы. Бұл тек өңірде ғана емес, соның ішінде Еуропада да ең биік топырақ бөгеттердің бірі. Мұндағы апаттық су ағызғыштың ұзындығы 891, су қабылдағыш құрылғының ұзындығы 43,6, энергетикалық туннельдің ұзындығы 543 метр. Қақпа шахтасы 56 метр тереңдікте. Мұнда заманауи жарықтандыру жүйесі орнатылған, аумақтағы жолдарға асфальт төселген. Баку-Ресей Федерациясы мемлекеттік шекарасы магистральды автомобиль жолынан Тахтакөпрі су қоймасына бөлінетін жол бойымен, сондай-ақ бүкіл аумақта үлкен көлемде абаттандыру және көгалдандыру жұмыстары жүзеге асырылды. Тек Тахтакөпрі су қоймасы бөгетінің денесінде ғана 23 миллион текше метрден астам топырақ жұмысы жүргізілді.